“S’pranojmë leksione demokracie nga ata që vrasin fëmijë”, kryebashkiaku i Athinës përplaset me ambasadorin izraelit

Kryetari i bashkisë së Athinës, Haris Doukas dhe ambasadori izraelit në Greqi, Noam Katz janë përplasur ashpër në distancës, pasi ky i fundit e akuzoi atë se nuk e mbronte qytetin nga grupet e organizuara antisemitiste dhe se imazhi i Athinës dekurajon turistët izraelitë.
“Ai nuk e pastron qytetin dhe i bën turistët izraelitë të ndihen në siklet”, tha diplomati izraelit në një intervistë me “Kathimerini”.
Me kritika të ashpra për gjenocidin në Gaza dhe duke kujtuar vlerat e demokracisë, Doukas iu përgjigj sulmit të Katz. I pari i qytetit tha se Athina është kryeqyteti i një vendi demokratik, i cili respekton absolutisht vizitorët e saj dhe mbron të drejtën e shprehjes së lirë të qytetarëve të saj.
“Si autoritet bashkiak i qytetit, ne kemi dëshmuar kundërshtimin tonë aktiv ndaj dhunës dhe racizmit dhe nuk pranojmë mësime për demokracinë nga ata që vrasin civilë dhe fëmijë në radhët e ushqimit, nga ata që çojnë dhjetëra njerëz drejt vdekjes çdo ditë në Gaza, nga bombat, uria dhe etja”, theksoi Doukas.
Kryetari i bashkisë së Athinës iu përgjigj gjithashtu vërejtjeve të ambasadorit në lidhje me grafitet, duke thënë se “fokusi i ambasadorit vetëm te grafitet (të cilat padyshim po fshihen), ndërsa në Gaza po ndodh një gjenocid i paparë”.
Në përfundim, Haris Doukas deklaroi se “vitin e fundit, numri i izraelitëve që iu dha një Vizë e Artë Greke është rritur me mbi 90%”, duke dërguar një mesazh se vendi mbetet i hapur dhe mikpritës, por jo i heshtur përballë asaj që po ndodh në Lindjen e Mesme.
PASOK gjithashtu lëshoi një deklaratë, duke i bërë thirrje, ndër të tjera, qeverisë greke të mbajë një qëndrim ndaj ambasadorit izraelit.
“Ne i bëjmë thirrje ambasadorit izraelit që të trajtojë ngjarjet në Gaza, spastrimin sistematik etnik, urinë kundër palestinezëve, braktisjen e bashkëqytetarëve të tij si pengje dhe të gjitha krimet kundër njerëzimit të kryera nga Qeveria e vendit të tij, të cilat kanë provokuar reagimin e bashkësisë ndërkombëtare, si dhe të opozitës demokratike dhe komunitetit akademik të Izraelit, dhe të lërë mënjanë vërejtjet estetike kundër kryetarit të bashkisë së Athinës, Haris Doukas, dhe autoriteteve bashkiake”, thekson partia kryesore e opozitës.