Të dielën, kryeministri Edi Rama do të mbajë një takim me emigrantët shqiptarë në Selanik të Greqisë. Për të ndjekur këtë takim janë nisur drejt shtetit fqinj disa media shqiptare, por një gjë e pazakontë ka ndodhur.
Grupet e televizioneve “Klan” dhe “A2CNN” janë bllokuar në doganë. Pretendimi për ndalimin e mediave është se duhet leje nga Ministria e Jashtme Greke për të xhiruar në tokë greke.
Grupet e dy televizioneve nuk janë lejuar të xhirojnë në Greqi dhe për këtë arsye kanë mbetur në doganë prej disa orësh.
Ekipet e “Klan”-it dhe të “A2CNN”-it kanë komunikuar me Ministrinë e Punëve të Jashtme të Shqipërisë dhe me konsullatën shqiptare në Selanik, por ende nuk janë lejuar të kalojnë në shtetin fqinj.
Kjo leje nuk u është kërkuar televizioneve në maj, kur ndoqën takimin e kryeministrit Edi Rama në Athinë.
