Takimi Rutte-Trump në Shtëpinë e Bardhë, Presidenti paralajmëron tarifa 100% ndaj Rusisë nëse nuk arrihet marrëveshje për Ukrainën

Sekretari i Përgjithshëm i NATO-s, Mark Rutte, është takaur sot me presidentit amerikan Donald Trump në Zyrën Ovale të Shtëpisë së Bardhë.
Në takim janë të pranishëm edhe zëvendëspresidenti JD Vance dhe Sekretari i Shtetit Marco Rubio.
Sipas burimeve zyrtare, presidenti amerikan shprehu zhgënjimin e tij për sjelljen e Rusisë në lidhje me luftën në Ukrainë. “Jam shumë i pakënaqur me Rusinë për luftën në Ukrainë,” tha Trump.
Trump theksoi dëshirën e tij për t’i dhënë fund luftës në Ukrainë, duke u shprehur se është “i zhgënjyer” nga presidenti Vladimir Putin.
Ai paralajmëroi vendosjen e tarifave të ashpra nëse nuk arrihet një marrëveshje brenda 50 ditëve. “Do të vendosim tarifa sekondare, dhe ato do të jenë 100%,” deklaroi presidenti.
Presidenti amerikan shtoi se Shtetet e Bashkuara prodhojnë pajisjet më të mira ushtarake, raketat më të mira dhe “çdo gjë më të mirë”. Ai konfirmoi se këto armë do t’i dërgohen NATO-s, dhe nënvizoi se “do të paguajnë për to”.
Sipas Trump, shpërndarja e këtyre armëve drejt Ukrainës do të koordinohet nga NATO. “Do të prodhojmë armë të nivelit më të lartë dhe do t’ia dërgojmë NATO-s,” tha ai, duke shtuar se aleanca do t’i dërgojë aty ku nevojiten më shumë.