Një ditë më parë kreu i Grupit Parlamentar të Partisë Socialiste zhvilloi një takim me drejtues të institucioneve lokale në Gjirokastër. Burime nga takimi thonë se Balla është treguar i ashpër me drejtorët përsa i përket performancës së tyre, raportit me qytetarët dhe strukturat e PS-së.
Ai u ka kërkuar më tepër angazhim në përmbushjen e programit të qeverisë, zbatimit të reformave dhe transformimin e zyrave të administratës në njësi ku qytetarët marrin zgjidhjez, jo si vende ku u shtohen problemet.
Balla ka qenë kritik edhe me drejtues të tjerë, të cilët krahas funksionit në administratë kanë edhe detyrime në strukturat partiake, por që në shumë raste nuk i përmbushin ato.
Takimi i djeshëm i Ballës pason atë të një jave më parë me Asamblenë e PS-së në Gjirokastër, ku merrnin pjesë deputetët Çuçi, Kumbaro e Golemi, si dhe Sekretari Organizativ i PS-së, Arben Pëllumbi.
Takime të tilla pritet të shpeshtohen në muajt e ardhshëm teksa po afron fushata elektorale për zgjedhjet e qershorit 2019, ndërsa PS ka piketuar tashmë pjesën më të madhe të kandidatëve.
©ArgjiroLajm.net
