Rrugëtimi i Shqipërisë në kualifikueset e Botërorit 2026 në Grupin K rezervon përballje të forta për kuqezinjtë, veçanërisht përballja me Serbinë, një ndeshje me ngarkesë të lartë emocionale dhe historike. Taulant Seferi, sulmuesi i Kombëtares, ka folur për këtë përballje dhe mbi pritshmëritë që ka ai dhe skuadra.
Deklarata më e fortë e tij lidhet me festimin në rast të një goli në transfertën e Beogradit, duke theksuar se simboli i shqiponjës mbetet një shprehje e krenarisë kombëtare.
“Kur na ra Serbia direkt mendova se do të jetë një kompeticion shumë emocional për të gjithë ne lojtarët. I kam thënë edhe shokëve që duhet të jemi me kokën e ftohtë dhe me zemrën flak, megjithëse e presim padyshim.
Si profesionist padyshim mendoj se do të jetë më ndryshe nga kualifikueset atëherë. Tani do të shohim më shumë futboll. Në atë kohë ka pasur shumë provokime nga ana e serbëve dhe ka eskaluar situata. Gjithçka që dëshiroj të them dhe që shpresoj është që në këto dy ndeshje ta tregojmë veten si profesionistë. T’i fitojmë të dy ndeshjet ndaj Serbisë dhe të kemi një kualifikuese shumë të suksesshme.
A do të festoj me shqiponjë në Beograd? Padyshim, e kemi shqiponjën në zemër në mes të Beogradit. Do zoti shënoj dhe padyshim që po”, u shpreh Taulant Seferi ndër të tjera për “Klan Kosova”.
