Ish-deputeti i LSI-së, Vangjel Tavo, ka reaguar në faqen e tij në Facebook lidhur me raportimet në media, përfshi edhe ArgjiroLajm.net, se kryebashkiaku i Dropullit, Dhimitraq Toli, ishte lënë jashtë ceremonisë së organizuar për nderimin nga Presidenti të ish-futbollistit Lefter Millo. Edhe pse kryetari i Dropullit ka deklaruar se nuk kishte ftesë nga Presidenca, Vangjel Tavo pretendon të kundërtën. Sipas tij, ka qenë këshilltari i Metës, Ylli Asllani, ai që e ka njoftuar kryebashkiakun e Dropullit.
“Fatkeqësisht, me trishtimin dhe zhgënjimin më të madh dëgjova sot zëra dashakeq dhe gënjeshtarë të cilët synojnë keqinformin dhe përçarje nga disa individë të cilët po përhapin të pavërteta tek banorët se Dropullit se në këto aktivitete nuk ishte ftuar Kryetari i emëruar i Bashkisë së Dropullit. Kryetari i emëruar i Bashkisë së Dropullit është lajmëruar për pjesmarrjen e tij nga këshilltari i Presidentit, z. Ylli Asllani, i cili ashtu siç lajmëroi edhe kryetarët e Tepelenës dhe Përmetit, lajmëroi edhe atë të Dropullit. Kryetarët e Tepelenës dhe Përmetit morrën pjesë në aktivitetet përkatëse duke nderuar banorët që ata përfaqësojnë dhe treguan respektin ndaj Presidentit të Republikës, ndërsa kryetari i Bashkisë Dropull vendosi të mos merrte pjesë në aktivitetin e organizuar në Dropull nga Akademia Sportive “Lefter Millo” me justifikimin se do ndiqte (vetë personalisht edhe pse e panevojshme, në orën 8 të mbrëmjes) një shqetësim me ujësjellësin e fshatit Selo”, shkruan Tavo.
Në vijim të reagimit të tij, Tavo shkruan:
“Gënjeshtra i ka këmbët e shkurtra. NDAL përçarjes dhe mashtrimeve. Nuk do arrini dot kurrë të shkaktoni konflikt. Madhështinë e atij aktiviteti në nderim të të madhit Lefter Millo nuk e zbeh dot as gënjeshtra e Kryetarit të emëruar Bashkisë dhe aq më tepër mos-prania e tij. Pjesmarrja e mediave dhe e popullit të Derviçanit e bëri të panevojshëm prezencën e tij. Çdo pretendim tjetër i Kryetarit të emëruar, nuk ia heq përgjegjësinë e pushtetit vendor që ai ka qoftë edhe për të siguruar mjetet protokollare. NDAL gënjeshtrave. NDAL përçarjeve. Respekt dhe vetëm respekt për banorët e Dropullit dhe legjendat e futbollit apo të çdo fushe tjetër që kanë buruar nga gjiri i tij”
Në videon më poshtë mund të ndiqni reagimin e kryetarit të Dropullit që thotë se si nuk pati ftesë nga Presidenca për të qenë pjesëmarrës në ceremoninë e organizuar për nderimin e Lefter Millos dhe disa figurave të tjera të sportit në radhët e minoritetit grek në Dropull.
©argjiroja.net
