Në letër ishin favorit absolut, kundër një rivali si Daugavpils, me letonezët që kishin një eksperiencë më pak se modeste në Evropë, por në fund, Vllaznia del e humbur nga “Elbasan Arena”, një humbje 0-1 që ndërlikon jashtëzakonisht shumë aventurën e tyre në Evropë. Ky ishte një përfundim i hidhur, por dhe i paralajmëruar, në një kohë kur ekipi i Edi Martinit shfaqi probleme të theksuara edhe gjatë fazës përgatitore, mbi të gjitha në mbrojtje ku pësuan një “thes” me gola. Letonezët i ndëshkuan në të vetmin rast që krijuan, në goditjen e parë në portë.
Ishte e qartë që Vllaznia do të kishte kontrollin e lojës, me shkodranët që e nisën sfidën në sulm, ku tentativën e parë të rrezikshme e lëshoi Kruja me një goditje nga distanca që përfundoi pak mbi traversë. Kuqeblutë shtuan ndejshëm ritmin e lojës, por Dodaj në një mbrëmje jo të mirë shpërdoroi shumë përpara porte. Brenda dy minutash, 35-37, sulmuesi shkodran u shfaq dy herë përballë portierit, me dy aksione thuajse fotokopje, por në asnjë rast nuk u tregua i saktë.
Historia nuk ndryshoi as në fraksionin e dytë, ku Qato dhe pjesa tjetër e ekipit tentuan në çdo formë të gjenin golin e avantazhit. Tentoi edhe Balaj me një vertikalizim të bukur, por pa sukses. Atëherë kur gjërat po shkonin drejt fundit, nga një aksion pa shumë pretendime, me një goditje me kokë ekipi letonez gjeti golin e avantazhit, duke sjell festë tek 4 tifozët e vetëm letonez që ishin të pranishëm në stadium. Goli befasoi Vllazninë, por tani Edi Martini dhe pjesa tjetër e stafit teknik janë në garë me kohë për të gjetur zgjidhje për ndeshjen e kthimit, në mënyrë që të shmangin një eliminim që do të ishte më shumë se zhgënjyes.
()
