Reth 90% e prodhimit të midhjes në liqenin e Butrintit janë dëmtuar. Kultivuesit e vendosur në zonën e Manastirit ankohen për ngordhje masive të vargjeve të midhjeve në një gjatësi 70 cm – 1 m për shkak të temperaturave deri në 40 gradë.
Zonat më të prekura sipas kultivuesit Hysen Mane janë ato që preken më pak nga qarkullimi i rrymave të ujit. Mane thotë se ka humbur 270 nga 300 tonë midhje që ka në impiant.
Sipas të dhënave të Drejtorisë së Peshkimit në Sarandë, shkaqet e këtij dëmtimi janë rritja e temperaturave të ujërave në lagunë, por dhe zgjatja e vargjeve të midhjeve përtej zonave të rekomanduara.
Por kultivuesit besojnë se shkak është bllokimi nga aluvionet i kanalit të Vivarit. Në liqenin e Butrintit zhvillojnë aktivitetin rreth 30 subjekte me gjithësej 78 impiante aktive.
Midhja, e dëmtuar prej ndryshimit të temperaturave në liqenin prej 1600 hektarë të Butrintit, shkon në 2.500 tonë.
Prodhimi vjetor i midhjeve bashkë me guaskën shkon në 13-15 mijë kuintalë, prej të cilëve vetëm 8-12 mijë shkojnë në tregun vendas dhe pjesa tjetër mbetet në ujë për mungesë tregu.
Tregtimi ndërkombëtar i midhjeve u ndërpre në vitin 1994 pas shpërthimit të gazit sulfurik që prodhoi tabani i liqenit të Butrintit dhe që intoksikoi midhjen./tch
