Nga viti në vit, tetori duket se mbetet një periudhë “problematike” për Elbasanin, që gjithmonë në këtë muaj përballet me vështirësi në rezultate dhe rënie në performancë.
Edhe pse skuadra zakonisht e nis mirë kampionatin, me entuziazëm dhe rezultate pozitive në javët e para, me ardhjen e tetorit duket sikur gjithçka ndalon. Një lloj “ngërçi” i pashpjegueshëm që përsëritet sezon pas sezoni dhe që këtë herë po shfaqet sërish në mënyrë të dukshme. Dy humbjet e fundit kanë bërë që të ulet morali në kampin verdheblu, sepse pritshëmritë këtë sezon për këtë skuadër janë të mëdha.
TETORI AKTUAL – Këtë sezon verdheblutë e nisën mirë rrugëtimin e tyre, por tetori u ka sjellë vetëm zhgënjim. Fillimisht, në transfertën ndaj Vllaznisë, ekipi i drejtuar nga Ivan Gvozdenoviç u mund me rezultatin 1-0, në një sfidë ku Elbasani nuk arriti të konkretizonte rastet dhe zhvilloi një pjesë të parë ndër më të dobëtat e këtyre shtatë javëve kampionat. Humbja u pasua më pas nga një tjetër zhgënjim, këtë herë në shtëpi, ndaj Vorës, ku përkundër mbështetjes së tifozëve në “Elbasan Arena”, verdheblutë u dorëzuan me rezultatin 1-2. Në të dyja ndeshjet, përveç humbjeve, problematikat ishin të dukshme edhe në lojë: mungesë ideje në ndërtim, vështirësi në finalizim dhe një mbrojtje që shpesh u gjend në vështirësi përballë presionit të kundërshtarëve. Kjo ka sjellë edhe pakënaqësi në ambientin e klubit, teksa kërkohet reagim i menjëhershëm për të mos humbur kontaktin me skuadrat e kreut. Tetori megjithatë nuk ka mbaruar ende. Elbasani ka edhe dy ndeshje të tjera përpara mbylljes së fazës së parë: fillimisht pret Bylisin në shtëpi, një duel që shihet si mundësi për rikthimin te fitorja, e më pas udhëton drejt kryeqytetit për t’u përballur me Tiranën, në një transfertë të vështirë, por vendimtare për moralin e skuadrës. Pikërisht këto dy sfida do të përcaktojnë nëse verdheblutë do të arrijnë të thyejnë mallkimin e tetorit apo do të vazhdojnë të mbeten nën hijen e tij.
TETORI I KALUAR – Nëse kthehemi pas me vetëm një vit, sezoni 2024-2025 tregon se kjo nuk është një rastësi. Edhe atëherë, Elbasani u përball me të njëjtin skenar. Pasi kishte bërë një nisje të fortë në javët e para, skuadra u ndal në tetor me katër barazime radhazi, duke humbur terren në renditje dhe duke mos përfituar dot nga gabimet e rivalëve. Rezultatet e atij muaji ishin të gjitha të ekuilibruara, me vetëm barazime, asnjë fitore, por të paktën nuk u mundën. Në letër, këto ishin rezultate të pranueshme, sidomos për një ekip që po rikthehej në elitë, por mungesa e fitores në katër ndeshje rresht ndikoi ndjeshëm në aspektin psikologjik dhe në renditjen e kampionatit. Ajo periudhë u konsiderua si “muaji i ngricës” për verdheblutë, ku ekipi nuk humbiste, por as nuk fitonte dot.
TETORI, TESTI I KARAKTERIT – Tashmë, historia duket se po përsëritet. Edhe pse sezoni është ende në fazë të hershme, Elbasani ndodhet përballë një prove karakteri. Klubi ka bërë një punë të madhe për stabilitet, përfshirë afrimet e verës, organizimin dhe mbështetjen e tifozëve, por për të ruajtur ambiciet e sezonit, skuadra duhet të tregojë forcë për ta përmbysur këtë prirje negative. Nëse ndaj Bylisit dhe Tiranës arrin të marrë rezultat pozitiv, Elbasani jo vetëm do të thyejë mallkimin e tetorit, por do të mbyllë fazën e parë me moral të lartë dhe me një mesazh të qartë se tashmë është një skuadër më e pjekur. Përndryshe, rënia e formës në këtë periudhë do të vazhdojë të mbetet “plaga” e përvitshme e ekipit që gjithmonë nis fort, por vështirë se ruan ritmin.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
