“Plazhet në Rivierën Shqiptare po bëhen gjithnjë e më të populluara, por nëse shkoni më në brendësi të vendit, do të zbuloni fshatra të qetë, lumenj të egër dhe aventura të pazakonta.” Kështu shkruhet në një artikull të botuar në të përditshmen britanike “The Times” nga Laura Sanders, e cila përjetoi një udhëtim fantastik shtatëditor në jug të Shqipërisë me një kosto 1,195 paund për person.
Në këtë artikull ajo përshkruan turin e saj njëjavor në maj për të zbuluar disa nga thesaret më pak të njohura të jugut të Shqipërisë.
Nga ku tregon se ka marrë një eksperiencë unike, duke eksploruar qytetet bregdetare, përpara se të zhytej në brendësi të vendit, ku vizitoi vendet e trashëgimisë botërore të UNESCO-s, shijoi ujëvarat e fshehura, qëndroi në ferma në male dhe bëri rafting në një nga lumenjtë e fundit të egër të Evropës.
Grupi prej tetë britanikësh, me moshë nga 30-50 vjeç, fillimisht shijoi plazhet me guralecë pa turma vizitorësh në jug. Ata qëndruan në Qeparo, ku shijuan ushqimet tradicionale vendase, por edhe ecjet përgjatë bregdetit me pamje epike të fshatrave duke arritur në plazhin e Broshit. Më pas ata nisën një aventurë piktoreske drejt Gjirokastrës, një qytet i epokës osmane i përfshirë në listën e trashëgimisë botërore të UNESCO-s. Pamja ishte e gjitha fantastike, maja të mbuluara me gjelbërim dhe livadhe të gjera, pa askënd përreth për kilometra të tëra. Qyteti ishte gjithashtu vendlindja e Enver Hoxhës, diktatorit komunist që sundoi Shqipërinë për 40 vjet – deri në vdekjen e tij në vitin 1985.
Kalaja e shekullit XIII, e ruajtur në mënyrë të mrekullueshme, e Gjirokastrës ofron pamje të gjera të rajonit dhe muret e saj të ftohta prej guri ofrojnë pushim nga nxehtësia e verës. Qyteti është shumë i popullarizuar në mesin e turistëve, por çmimet ishin të arsyeshme.
Ndalesa e tyre e radhës ishte sërish drejt maleve, në një tjetër turne ku i priste një peizazh spektakolar karstik. Ku udhëtuan përgjatë shtigjeve marramendëse drejt fshatit Hoshtevë në Zagoria.
Qëndrimi i radhës ishte në një shtëpi fshati 120-vjeçare të restauruar me pamje nga lugina e Vjosës, ku rrjedh Vjosa, një nga lumenjtë e fundit të egër të Europës, ku grupi i turistëve britanikë u argëtua duke bërë rafting në ujërat e kristalta.
Aventura e tyre e fundit në Shqipëri ishte udhëtimi drejt Liqenit të Ohrit i cili është në kufi me Maqedoninë e Veriut, ku qëndruan në fshatin e qetë të Linit dhe më pas përshkuan me biçikletë zonën e liqenit duke shkuar drejt Pogradecit. Ohri, një nga liqenet më të vjetër të Europës, është i mbrojtur nga UNESCO.
Dhe në fund të artikullit, Shqipëria rekomandohet si vendi ideal nëse po kërkoni të përjetoni pushime autentike me aventura në natyrë dhe trashëgimi kulturore.
