Tirana me probleme serioze në formacion për ndeshjen me Luftëtarin që do të zhvillohet në Gjirokastër. Klubi badheblu ka zyrtarizuar nëpërmjet një njoftimi zyrtar mungesën e Afrim Takut, i cili është pezulluar nga drejtuesit për shkak të debatit që ka patur me trajnerin Mirel Josa për zëvendësimin e tij në takimin me Skënderbeun. 27-vjecari, më i spikaturi në radhët e bardhebluve në këtë sezon, nuk është stërvitur në asnjë seancë stërvitore me grupin, cka linte të nënkuptohej që të paktën për takimin e radhës nuk do të grumbullohej nga Josa.
Por mungesa e Takut nuk është prblemi i vetëm për Tiranën. Gentian Muca dhe Erando Karabeci mbeten jashtë për arsye dëmtimi, ndërsa Merveille është i pezulluar pasi ka plotësuar numrin tre të kartonëve të verdhë.
Të katër këta lojtarë në fakt përbëjnë boshtin e skuadrës bardheblu që nga mbrojtja e deri në sulm, ndaj mungesa e tyre mund të jetë shumë e ndjeshme përballë një kundërshtari që luan një fitboll të bukur dhe të shpejtë dhe që jo më kot renditet në vendin e katërt, me 3 pikë më shumë se Tirana.
