Një vaksinë e re, e cila mbron kundër koronavirusit, është thuajse 95 përqind efektive. Sipas BBC, bëhet fjalë për vaksinën e kompanisë amerikane Moderna. Lajmërimi vjen disa ditë pasi kompania Pfizer tha se vaksina e saj ofron 90 përqind mbrojtje kundër Covid-19.
Moderna tha se kjo është një ditë e madhe. Ata planifikojnë të marrin miratimin nga autoritetet së shpejti. Të dy kompanitë përdorin një qasje thellësisht inovative dhe eksperimentale për vaksinat e tyre. Këto dy lajme kanë shtuar shpresën se vaksinat do i japin fund pandemisë. Në testime u përfshinë 30 mijë njerëz në SHBA. Gjysmës iu dha vaksina e ndarë në dy doza me katër javë kohë diferencë. Të tjerët morën injeksion fals. Pas rezultateve, kompania thotë se vaksina ofron mbrojtje në masën 94.5 përqind.
Tal Zaks i kompanisë Moderna tha për BBC se efektshmëria është befasuese. Megjithatë akoma nuk dihet sesa zgjat imuniteti. Kompania thotë se fuqia e saj nuk zhduket te moshat më të mëdha. Gjatë testimeve nuk është raportuar ndonjë efekt anësor domethënës. Të dy vaksinat, edhe ajo e Pfizer, injektojnë në trup një kod gjenetik të virusit në mënyrë që të provokohet një reagim imunitar. Nëse vaksinat miratohen, ekziston mundësia që të nisë shpërndarja e tyre që në dhjetor.
