Luftëtari nuk ia arriti qëllimit të merrte tri pikët në ndeshjen me Teutën, ku i kishte mundësitë për të shënuar të paktën një gol. Trajneri Hasan Lika është shprehur pas kësaj ndeshjeje se Luftëtari meritonte më shumë se barazimi. Sipas tij, te Luftëtari, përveç kolektivit, duhet të funksionojnë sa më mirë edhe disa individë:
“Kemi krijuar volum loje dhe raste shënimi në portën kundërshtare, por nuk kemi shënuar edhe për meritë të portierit Moçka. Gjërat u vështirësuan gjatë ndeshjes pikërisht ngaqë nuk po shënonim. Kërkonim ta fitonim ndeshjen dhe mendoj se meritonim më shumë se barazimi.
Europa? Jemi afër këtij objektivi, por duhet të jemi më të suksesshëm, duke fituar në fushën tonë, por edhe në transfertë. Kemi pretendime të luajmë më mirë në ndeshjet e mbetura dhe të shkojmë në Europë.
Kemi pasur probleme me Rrocën dhe Abazajn gjatë javës, sepse ata kanë pasur dëmtime, por deshën të jepnim maksimumin në këtë ndeshje. Ndoshta nuk ishin në 100% të formës. Duhet të funksionojnë më mirë disa individë të veçantë, përveç kolektivit.
Janë edhe tetë ndeshje deri në fund të kampionatit dhe do të vazhdojmë të punojmë për të bërë më të mirën për Luftëtarin”, – tha trajneri i ekipit gjirokastrit.
