Atmosfera te Luftëtari ka qenë entuziaste gjatë ditës së djeshme. Në fakt, fryma në grup te gjirokastritët është një faktor i rëndësishëm në ecurinë e mirë të ekipit, por mbi të gjitha lojtarët me njëri-tjetrin, duke përfshirë këtu edhe stafin teknik nga Uruguai kanë një raport special.
E mërkura ka qenë e veçantë, pasi një prej titullarëve të skuadrës, Donald Rapo, kishte datëlindjen. Shokët e ekipit dhe stafi e uruan lojtarët që në seancën e paradites, që u zhvillua në stadium. 27-vjeçari që luan sezonin e tretë në Gjirokastër është surprizuar për faktin se adresa të tij kishte mbërritur një tufe e madhe me trëndafila dhe lule.
Dërguesi mbetej anonim, teksa edhe vetë Rapo nuk kishte dëshirë të tregonte diçka më tepër, pasi u pyet nga gazetën. Mirëpo, në këtë moment, sapo lojtarët e tjerë e morën vesh për çfarë bëhej fjalë, nisën batutat. Mbrojtësi i majtë falënderoi shokët për urimet, ndërsa këta të fundit nuk kursyen ngacmimet për tufën me trëndafila që kishte mbërritur në Gjirokastër nga kryeqyteti.
Mesfushori Eduard Roca ishte një nga ata që e ngacmoi më tepër Rapon. Madje nuk ngurroi që të bënte “show”, duke ia marrë fillimisht dhuratën dhe ia dorëzuar më pas, në një moment që u shoqërua me disa foto. 27-vjeçari po kalon një formë të shkëlqyer këtë sezon, duke qenë stabël në formacion si mbrojtës i krahut të majtë.
Debutimi i tij në Superiore ishte në kampionatin e kaluar, teksa me trajnerin Mlladen Milinkoviç luajti në disa pozicione. Rapo mbahet mend për supergolin që i shënoi Kukësit në barazimin 2-2 në dhjetor të vitit të kaluar. Lojtari që ka lindur në Tiranë në të kaluarën ka luajtur me Burrelin.
