Tritan Shehu nuk e ka seriozisht as këtë fushatë në Gjirokastër. I mjafton thjesht mandati i tij gati i sigurt dhe jo fitorja e PD-së. Një ditë pas hapjes së fushatës elektorale, në vend që të ishte në Gjirokastër në takime për të bindur sa më shumë njerëz për të votuar opozitën, ai kishte shkuar në Shkodër në një aktivitet për anestezinë.
Aktiviteti mund të jetë i rëndësishëm, por për opozitën jetike është të largojë Edi Ramën dhe të vijë në pushtet. Këtë gjë do të kishte bërë çdo parti opozitare në botë, aq më tepër kur ka më shumë se një dekadë larg pushtetit. Tani Tritan Shehu duket se ka më shumë hallin e simpoziumeve shkencore për mjekësinë sesa betejën opozitare.
Të kuptohemi, jo se po të mos kishte shkuar në Shkodër e të ishte në Gjirokastër me Dashon do të kishte bërë namin me vota, por të paktën sa për sy e për faqe në kulmin e fushatës të shkosh nëpër simpoziume shoqatash është humbje kohe dhe tregon se as kësaj radhe nuk e kanë seriozisht betejën me Ramën. Janë në këtë garë vetëm për disa karrige në Kuvend, me shpresë se do të vijojnë të ngelen partia e dytë në vend. ©Argjiroja.net
