Tritan Shehu është prezantuar këtë të shtunë me strukturat e Partisë Demokratike në Gjirokastër si drejtues politik i këtij Qarku. Takimi ka çelur kështu zyrtarisht fushatën elektorale të demokratëve në qarkun e jugut. Shehu tha se 25 prilli do t’i japë fund një regjimi autokratik.
“Sot PD e Gjirokastrës ndez motorët elektoral drejt fitores së 25 prillit. Ne jemi mbledhur me drejtuesit e degës së PD në këtë qark për të mobilizuar jo vetëm strukturat e PD, por edhe të gjithë elektoratin e këtij qarku me një traditë të madhe historike, për ti dhënë fund këtij regjimi autokratik, i cili këtë qark e ka lënë në varfëri, represion, përmbysje, e ka mbytur me arrogancën, por edhe me pandeminë. Ne do të ecim drejt 25 prillit të sigurt, datë e cila do të shënojë përmbysjen e madhe për Shqipërinë, daljen nga kjo mizerje, ndërprerjen e braktisjes së imponuar nga njerëzit dhe për ti dhënë sërish vlerat e progresit”, tha Shehu.
Kandidatura e Tritan Shehut u shpall tre dite me parë nga kreu i PD Lulzim Basha për të qenë kryesues i listës se kandidatëve për deputetë në Gjirokastër, pavarësisht Komisioni i Vlerësimit të Kandidatëve i ngritur pranë PD për të vlerësuar emrat më të mirë që duhet të përfaqësonin këtë forcë politike në parlament, e përjashtoi nga listat.
