Drejtuesi politik i PD-së në Gjirokastër, Tritan Shehu, thotë se njerëz të lidhur me fushatën e PS-së kanë kërcënuar gazetarin P.N. Sipas tij kjo bëhet për arsye politike. Shehu i bën thirrje organeve ligjzbatuese të marrin masat për t’i garantuar sigurinë. Më poshtë deklarata e plotë e Shehut.
KERCENOHET MEDIA
Frika nga ndëshkimi me votë i ka çuar pushtetarët të përdorin shantazhin dhe kërcënimin, madje edhe ndaj gazetarëve. Dje, gazetari i mirënjohur P.N është kërcënuar me jetën e tij dhe të familjarëve nga persona të lidhur me fushatën elektorale të Partisë Socialiste. Kjo ngjarje e rëndë ka ndodhur për arsye thjesht politike. P.N e ka bërë denoncimin pranë organeve ligjzbatuese, të cilat u bëj thirrje publike të marrin menjëherë të gjitha masat për të garantuar sigurinë e çdo qytetari dhe për të ndëshkuar kërcënimet dhe autorët pas tyre. Askush nuk duhet të kërcënohet. Liria e medias dhe siguria e qytetarëve janë vija të kuqe.
