Ish-kryeministri i Greqisë, Alexis Tsipras nuk i ka kursyer elozhet ndaj kreut të qeverisë shqiptare, Edi Ramës lidhur me përballimin e situatës së koronavirusit. Në një intervistë të dhënë për televizionin grek “Kontra Channel”, Tsipras ka folur lidhur me shifrat e të prekurve dhe viktimave që ka vendi i tij, duke i krahasuar me Shqipërinë dhe Bullgarinë. Edhe pse media të ndryshme të huaja pak ditë më parë vlerësuan masat e marra nga Greqia, sërish sipas ish-kryeministrit nuk është bërë aq sa duhet.
“Ne si opozitë, kemi bërë gabime por edhe lëshime. Por as qeveria nuk duhet të dalë e të thotë se është më e përsosura në botë. Sepse nëse është më e përsosura në botë, çfarë mund të thonë fqinjët tanë, sepse Italia nuk është i vetmi vend fqinj me ne. Dmth, Rama, i cili ka vetëm 25 njerëz të vdekur, është Perëndi. Apo Borisov, është gjysmë-zot. Duhet të shohim si kemi reaguar ne si qeveri, pastaj si shërbim shëndetësor dhe pastaj si opozitë për të arritur sukses,”-tha në fjalën e tij ish-kryeministri.
Deri më tani, Greqia është një nga vendet që ka marrë masa më të rrepta për parandalimin e përhapjes së koronavirusit, megjithatë shënon 2,192 persona të infektuar me COVID-19, 102 të vdekur, ndërsa vetëm 247 pacientë ia kanë dalë që t’i shpëtojnë sëmundjes. Ndërsa në vendin tonë rezultojnë të infektuar 518 persona, janë shënuar 26 viktima dhe 277 të tjerë kanë fituar betejën me COVID-19.
