Operatorët turistikë dhe shoqatat e tyre janë mbledhur sot në Gjirokastër për të diskutuar çfarë do të bëjnë me sezonin në kushtet e krizës së Covid-19. Në takimin e thirrur nga kryebashkiaku Flamur Golemi, ky i fundit është shprehur ndër të tjera se Bashkia Gjirokastër do të bëjë hyrjen falas në muzeume.
“Ndamë mendimet për të krijuar një strategji të përbashkët për turizmin duke iu përshtatur kushteve të reja të imponuara nga COVID-19. Unë do t’i propozoj Këshillit Bashkiak që operatorët turistikë të kenë akses FALAS në muzeumet e Gjirokastrës për turistët dhe besoj që ky propozim do të ketë mbështetjen këshilltarëve”, shkruan Golemi në Facebook.
Më tej ai shprehet se brenda mesit të këtij muaji do të jenë gati paketat turistike me çmime më të ulëta se zakonisht dhe do të nisë promovimi i tyre.
“Gjirokastra do të ketë turizëm edhe në këtë vit të vështirë. Veç shumë atraksioneve të tjera që ne ofrojmë, le të mos harrojmë edhe një fakt tjetër. Gjirokastra ka qenë ‘qytet i gjelbër’ që prej ditëve të para të pandemisë e deri më sot, duke mos patur asnjë të infektuar me Covid-19. Në kohët që jetojmë edhe ky është një element që duhet marrë parasysh teksa planifikoni pushimet tuaja”, shprehet Golemi.
©argjiroja.net
