Miliona besimtarë myslimanë në mbarë botën kremtojnë Kurban Bajramin. Por festa më e rëndësishme e kalendarit të besimit islam, këtë vit shënohet nga pandemia koronavirus që ka kushtëzuar sjelljet tradicionale.
Në shumë vende të globit ka munguar falja e namazit në sheshe dhe xhami për shkak të protokolleve strikte të sigurisë për të frenuar përhapjen e Covid-19. Por ka edhe përjashtime si në rastin e Turqisë.
Besimtarët u mblodhën në xhamitë e vendit dhe natyrisht kryen faljen e Bajramit duke mbajtur maska dhe respektuar distancimin fizik. Për herë të parë Bajrami u fal edhe në godinën historike të “Shën Sofisë”, të kthyer prej disa ditësh në xhami.
Faljen e namazit të parë të bajramit në Xhaminë e Madhe të Shën-Sofisë, e cila u rihap për adhurim pas 86 vitesh, e bëri kreu i Entit të Çështjeve Fetare (Diyanet), prof.dr. Ali Erbas. Namazi i parë u falë me pjesëmarrjen e mijëra qytetarëve, të cilët mbushën xhaminë dhe rrethinën.
Kreu i Diyanetit e lexoi edhe hutben e parë të Bajramit të Kurbanit në Xhaminë e Madhe të Shën-Sofisë pas 86 vitesh, ku tha: “Le ta përjetojmë paqen e festës të gjithë së bashku. Sidoqoftë, le të mos i bëjmë të trishtueshme këto ditë të çmuara duke shkaktuar përhapjen e sëmundjes. T’i respektojmë rregullat për mbajtjen e maskës dhe të distancës sociale. Le të distancohemi nga shtrëngimi i duarve dhe përqafimeve gjatë ditëve të festës dhe gjatë epidemisë”.
Në fund të hutbes Erbas e bëri edhe këtë lutje: “Zoti ynë i Madhërishëm të na mbrojë nga të gjitha llojet e fatkeqësive dhe telasheve. Le të na lirojë nga epidemitë, lufta dhe vuajtjet. Le të na bashkojë edhe në shumë bajrame të begatshme. Paqja, mëshira, mirësjellja dhe mirësia e Allahut qofshin mbi ne. Urime festa e Bajramit të Kurbanit”.
Eid al-Adha, Festa e Sakrificës, është një më të rëndësishmet e kalendarit Mysliman dhe gjatë saj përfshihet edhe peligrinazhi në qytetin e shenjtë të Mekës, të njohur ndryshe dhe si Haxhi, që është dhe një ndër 5 shtyllat kryesore të besimit.
Me maska në fytyrë dhe kontrollim temperature qindra mijëra besimtarë pushtuan xhamitë në Indonezi për të falur Kurban Bajramin. Respektimi i distancimit fizik ishte një rregull i padiskutueshëm që u respektua gjatë ritualeve. Ceremonitë fetare ishin më të shkurtra se zakonisht për të minimizuar rreziqet për përhapjen e Covid-19.
