Policia greke ka zbuluar lidhje të dyshimta me të ashtuquajturën “Mafia greke” në telefonin e 39-vjecarit nga Divjaka, Armiol Rrasa, i arrestuar të premten në Athinë teksa kishte fshehur në kanalin e ajrit të sediljeve të pasme të makinës 1 pistoletë TT dhe 2 kallëpe tritoli.
Celulari i tij duket se ka “kontakte” me persona që dyshohet se janë lart në hierarkinë e grupeve të gjobvënies në Greqi.
Oficerët e sektorit kundër gjobvënieve në policinë e Athinës po hetojnë se ku do të përfundonte sasia e tritolit, për kë po transportonte 39-vjeçari dhe nëse do të përdorej në shpërthime të natyrës zhvatëse.
Ndërkohë është zbuluar dhe arsyeja pse ai u arrestua në 2008 dhe u lirua në 2015 edhe pse ishte i dënuar me burgim të përjetshëm. Konkretisht Rrasa është arrestuar pasi është kapur me 4 kg heroinë dhe 40 kg marijuanë. Ai është dënuar nga shkalla e parë e gjyqësorit me burgim të përjetshëm, ndërsa ka qenë apeli ai që i ka dhuruar lirinë.
Armiol Rrasa i njohur si “Ari” rezulton i arrestuar 12 herë në Greqi, madje për herë të parafundit ndaj tij është ngritur akuzë në qershor të këtij viti për përdhunimin e një te miture, nga e cila nuk dihet se si ka shpëtuar pa qëndruar në qeli pasi vetëm një muaj më pas rezuton të jetë arrestuar sërish për “shkelje të rregullave të qarkullimit rrugor”.
