Ka dalë në dritë për herë të parë e detajuar dhe e qartë se si u zbulua krimi monstruoz që ndodhi ditën e mërkurë (dje) në Andravida, zonë e Iliada në Pyrgos, Peloponez në Greqi. Argjirolajm.net ju sjell detajet e plota dhe të konfirmuara nga policia dhe grupi hetimor grek.
Të mërkurën në orën 14, Mihali 12 vjeçar, del nga shtëpia ku jetonte me 2 vëllezërit, Aliun 3 vjeçar, Edin 2 vjeç, nënën e tij Marije Dosku, 37 vjeçar dhe njerkun 32 vjeçar, Armando Kloci. Ai i thotë nënës se do dilte të luante me një shok moshatar të lagjes. Dhe ashtu bëri. Mori biçikletën dhe doli. Shoku i Mihalit rrëfeu për mediat greke çfarë ndodhi më pas:
“Kaluan disa orë dhe aty nga ora 19, Mihali më thotë, hajde ikim te shtëpia ime se dua të marr diçka për të ngrënë. I ra derës, por askush nuk u përgjigj. Më tha, po futem nga dritarja. Papritur më thërret, shpejt hajde shpejt se diçka ka ndodhur moj nëna ime.
Futem dhe unë nga dritarja, kontrollojmë shtëpinë dhe shohim fëmijën e vogël Edin në krevat fëmijësh dhe menduam se po flinte”, thotë ai dhe vazhdon:
“Pastaj pamë gjak në dhomën ku flinin prindërit. Por asnjë tjetër nuk pamë në shtëpi. Më pas dola dhe shoku im doli jashtë duke mbajtur vëllain e tij, i cili kishte shenja të kuqe të ndezura në qafë dhe gjak në gojë…” përfundon dëshmia e shokut të Mihalit.
Kur Mihali ka dalë në rrugë, ka bërtitur për ndihmë. Ai nuk e dinte se Edi kishte vdekur. Kalimtarët që u afruan e panë se fëmija ishte si i ngrirë dhe kuptuan se nuk jetonte. Megjithatë thirrën autoambulancën e cila e dërgoi në spital ku fëmija u shpall i vdekur.
E ndërsa ndodhte kjo, në banesën e familjes Kloci mbërriti policia. Ajo konstatoi shpejt, se në shtëpi, kishte të tjerë viktima. Në pjesën e pasme të shtëpisë, gjendej një rimorkio makine. Pranë saj ndodhej mbuluar në tokë, mbështjellë me çarçaf, djali tjetër, Aliu 3 vjeçar, i vdekur.
Brenda në rimorkio, gjendeshin trupat e Marijes dhe Armandos. Policia konstatoi se burrë e grua ishin vrarë me armë zjarri, kurse fëmijët ishin mbytur me duar.
Në banesë u pa se energjia elektrike ishte jashtë funksionit. Kërkimet e bëra, çuan në dyshimin e fortë se vrasësi ishte një burrë 57 vjeçar, baba i dy fëmijëve, fqinjë me familjen e masakruar, ose djali i tij.
Në fakt që të dy mungojnë dhe nuk gjenden. Hetimi nxori se mes fqinjëve kishte pasur kohët e fundit debate për mosmarrëveshjet financiare në lidhje me qiranë që paguante familja shqiptare te greku që ishte pronar shtëpie.
