Ndeshja Luftëtari-Bylis, e vlefshme për turin e dytë të Kupës së Shqipërisë (ndeshja e kthimit), nuk u zhvillua, sepse autobusi i ekipit ballshiot pësoi defekt gjatë rrugës dhe nuk mbërriti në kohë në Gjirokastër.
Gjyqtari Sokoli zbatoi rregulloren, duke pritur 45 minuta dhe më pas u mbyll gjithçka. Sipas rregullores, Luftëtarit i takon fitorja në tavolinë, që do të thotë kualifikim në çerekfinale. Presidenti i Bylisit, Besnik Kapllanaj, kërkon që ndeshja të luhet, pasi skuadra e tij nuk arriti në kohë për një arsye të fortë.
Por edhe presidenti i Luftëtarit, Grigor Tavo, është shprehur dakord me luajtjen e ndeshjes në një ditë të cakatuar, ndoshta edhe që sot, duke thënë se ajo që i ndodhi Bylisit mund t’i ndodhë çdo ekipi futbolli. Tani pritet vendimi zyrtar i FSHF-së, që me siguri do t’u japë fitoren në tavolinë gjirokastritëve.
