Situata pas shpërthimit të ujërave të zeza në plazhin e Ksamilit duket sikur është normalizuar tashmë dhe për këtë është dashur angazhimi i Ushtrisë. Pushuesit janë rikthyer në plazh, ndërkohë që kanali, i hapur një ditë më parë për të riparuar defektin, është mbyllur, ndërsa punëtorët e firmës që kanë kryer punimet kanë bërë dhe dezinfektimin e zonës përreth.
Ndërkohë biznemenë të zonës shprehen se kanë pësuar dëme të shumta nga ngjarja. Vetë kryetarja e Bashkisë së Sarandës, Florjana Koka, duke u kërkuar ndjesë të dëmtuarve nga kjo situatë, shprehet se kontrata me firmën ndërtuese është bërë nga Delegacioni i Bashkimit Europian, që është edhe financuesi i këtij projekti, me vlerë 3.5 milionë euro.
“Më duhet të them me shumë përgjegjësi që ky është një projekt jetik për Ksamilin, jetik për Bashkinë e Sarandës, por është një projekt i cili është kontraktuar në vitin 2012 nga Delegacioni Europian në Shqipëri. Është supervizuar po ashtu nga ata dhe shteti shqiptar së bashku me përfituesit finalë që janë Bashkia dhe Ujësjellës-Kanalizime Sarandë. Bashkia dhe Ujësjellës-Kanalizime Sarandë nuk kanë pasur dorë në zbatimin e këtij projekti. Ne jemi ata që e kemi marrë nga fundi i majit me një certifikatë të përkohshme të punimeve, që do të thotë që në një hark kohor 12-mujor nga ajo ditë, firma e kontraktuar është përgjegjëse dhe garantore e funksionimit normal të këtij projekti të zbatuar në Ksamil. Duhet parë me shumë seriozitet për të kuptuar çfarë ka ndodhur në këtë projekt dhe për të nxjerrë po ashtu edhe përgjegjësit dhe për të mos u përsëritur në të ardhmen”, – u shpreh Koka
