Vangjel Tavo ka dhënë një intervistë për mediat lokale në Vlorë pas emërimit të tij si prefekt i qarkut nga kryeministri Edi Rama. Me entuziazëm të lartë për transformimet në Vlorë dhe duke theksuar disa herë vëmendjen e madhe që Rama ka për Vlorën, Tavo tha se “do të siguroj zbatimin e programit strategjik dhe zhvillimor të qeverisë në nivel qarku”.
3 vite më parë ai akuzonte Ramën për varfërim e shpopullim të vendit. Thoshte gjithashtu se Rilindja është një sekt dhe se Rama iu solli shqiptarëve vaksina të skaduara. Ndërsa sot është shprehur se ndihet i nderuar që u prezantua në Vlorë nga Edi Rama.
“Është nder për mua që të vijë të më prezantojë vetë kryeministri. Padyshim nuk është vetëm ky momenti që kryeministri po i jep rëndësi Vlorës. Kryeministri ka vite që po merret më Vlorën”, u shpreh Tavo duke kujtuar ndërkohë edhe sloganin e dikurshëm të LSI, “të ecim më shpejt”.
“Duhet të lëvizim më shpejt, në mënyrë që qytetarët e Vlorës ta ndiejnë, jo thjesht ta shikojnë ndryshimin që po ndodh”, deklaroi Tavo në intervistën për Tv 6 plus 1 në Vlorë.
Në janar të këtij viti kur gazeta greke “Kathimerini” botoi lajmin se Rama po përgatiste Vangjel Tavon për kryetar të përkohshëm në Himarë, ish-deputeti i LSI reagoi duke thënë se nuk kishte dëshirë të merrej me politikë. Një javë më parë ai pranoi emërimin e Edi Ramës për të qenë prefekt i qarkut Vlorë. ©Argjiroja.net
