Dejvi Bregu cilësohet si përforcimi kryesor i skuadrës së Skënderbeut për sezonin e ardhshëm. Por mesfushori i talentuar vlonjat nuk është “arma” e vetme që korçarët kanë siguruar për sezonin e ri, pasi që në qershor, atyre u bashkohen dy futbollistë të tjerë me të cilët kanë akord që në janar.
Në ditët e fundit të janarit, korçarëve iu bashkuan për disa ditë në stërvitje Egzon Sekiraça dhe Mohamad El-Kajed. Si futbollisti me origjinë shqiptare, ashtu edhe lojtari i Palestinës U-23, kanë pasaportë suedeze dhe gjetën brenda pak ditësh akordin me klubin korçar për të filluar bashkëpunimin me të.
Por trajneri Daja nuk kishte mundësi për të aktivizuar rregullisht këta lojtarë të cilëve u duhej kohë për t’u ingranuar në manovrën e skuadrës ndaj ata u huazuan për 6 muaj te skuadra e Trepça ’89 në Kosovë. Të dy lojtarët do të vihen nën urdhrat e Dajës në fillimin e fazës përgatitore për sezonin e ri, para se të vendoset se si do të veprohet me ta, nëse do të bëhen pjesë e grupit të korçarëve apo do të jepen përsëri huazim meqë kanë kontrata për dy sezonet e ardhshme.
