Komisioni i Pavarur i Kualifikimit ka njoftuar sot se ka shtyrë seancën dëgjimore për ish-kreun e Gjykatës së Gjirokastrës, Guximtar Boci.
“Komisioni i Pavarur i Kualifikimit njofton se seanca dëgjimore për subjektin e rivlerësimit z. Guximtar Boçi, e përcaktuar për t’u mbajtur në datën 28.4.2022, ora 10:00, nuk do të zhvillohet. Komisioni për arsye objektive ka vendosur të shtyjë seancën në datë 4.5.2022, ora 13.30”, thuhet në njoftimin e KPK.
Gjyqtari Guximtar Boçi eshte pezulluar prej vitit 2016 pas publikimit të një audio-skandali ku ai kerkonte favore seksuale ne kembim te nje vendimi gjyqesor. Procesi i tij i vetingut po kryhet nga trupa e përbërë nga Suela Zhegu, Brunilda Bekteshi dhe Lulzim Hamitaj.
Guximtar Boçi e ka nisur karrierën e tij në sistemin e drejtësisë në vitin 1996 dhe ka punuar si gjyqtar dhe kryetar gjykate në Gjirokastër.
Në vitin 2016, Këshilli i Lartë i Drejtësisë e shkarkoi Boçin nga detyra e kryetarit të Gjykatës dhe e pezulloi atë si gjyqtar, pas publikimit të një audioje në emisionin “Stop”, ku ai akuzohej se kërkoi favore seksuale në këmbim të një vendimi gjyqësor.
Në vitin 2017, prokuroria e pushoi procedimin penal ndaj Boçit dhe një vit më vonë ai fitoi pafajësinë me vendim të Gjykatës së Apelit të Vlorës. Boçi ka kërkuar prej asaj kohe rikthimin në sistemin gjyqësor, por Këshilli i Lartë Gjyqësor i ka rrëzuar kërkesat e tij.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale.
Në deklarimin për të herë të parë në vitin 2003, Guximtar Boçi deklaronte pasuri me vlerë 1.6 milionë lekë, ndërsa në fund të vitit 2016, pasuria e tij familjare kapte vlerën e 5.1 milionë lekëve.
Ai deklaron likujditete bankare me vlerë 2.6 milionë lekë, pasuri të patundshme me vlerë 1.5 milionë lekë, automjet me vlerë 600 mijë lekë si dhe kursime në cash prej 350 mijë lekësh.
Të ardhurat familjare për periudhën deklaruese janë 18.3 milionë lekë, nga të cilat 74% kanë si burim pagën nga funksioni të subjektit, 7% pagën e familjarëve dhe 18% nga burime të ndryshme.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 13 vite, asnjë prej deklaratave nuk rezultoi me probleme. .
