Arbenit Xhemajli pritet të prezanto het së shpejti nga Aktobe, duke bërë një hap të madh në karrierën e tij jashtë Shqipërisë. Klubi kazak ka arritur marrëveshjen me Egnatian për transferimin e mbrojtësit, ndërsa vetë Xhemajli ka dhënë sinjalet e para pas fitores së fundit kundër Dinamos, duke treguar dëshirën e tij për të sfiduar veten në një kampionat të ri.
Ky largim është një humbje e ndjeshme për Egnatian, pasi Xhemajli nuk ishte thjesht një mbrojtës i fortë, por edhe një lider i natyrshëm në fushë. Përveç aftësive të tij teknike dhe fizike, ai shërbente si pikë referimi për lojtarët e rinj dhe garantonte stabilitet në prapavijën e ekipit. Me fillimin e sezonit në Kazakistan që është vetëm pak ditë larg, klubi i Aktobes do të përfitojë nga shkathtësitë e tij në mbrojtje dhe përvojën e fituar në Shqipëri.
FITON KLUBI, “HUMB” TETOVA – Nga ky transferim, Egnatia përfiton një pagesë të rëndësishme që do të mbushë arkën e klubit, por humb një lojtar të paçmuar për strukturën e ekipit. Bashkë me Aleksin dhe Fernandon, Xhemajli ishte pjesë e treshes më të paguar të kampionëve të Rrogozhinës, duke treguar jo vetëm rëndësinë taktike, por edhe vlerën ekonomike që mbart. Largimi i tij është i mirëpritur nga lojtarët dhe drejtuesit për mundësitë që hap për karrierën e Xhemajlit dhe për fitimet e klubit, por për trajnerin Edlir Tetova kjo situatë paraqet një sfidë të vërtetë. Në kulmin e sezonit, humbja e një nga mbrojtësit më të qëndrueshëm dhe më të besueshëm të ekipit është një pengesë e madhe, duke kërkuar riorganizim dhe kreativitet në formacionin mbrojtës.
NDRYSHIMET TAKTIKE – Me mungesën e Xhemajlit, Tetova pritet të rikthehet te formacioni me tre mbrojtës, një skemë që e ka provuar me sukses në ndeshjen kundër Dinamos. Kjo do të kërkojë që mbrojtësit e tjerë të marrin më shumë përgjegjësi, duke rritur komunikimin dhe bashkëpunimin në qendër të mbrojtjes.
Për më tepër, Tetova mund të duhet të rishikojë edhe strategjinë e ekipit në tërësi, duke kompensuar mungesën e Xhemajlit me mbështetje më të madhe nga prapavija. Ndërkohë, rrogozhinasit po përgatiten intensivisht për ndeshjen e radhës kundër Partizanit, e cila zhvillohet këtë të shtunë në “Arena e Demave”. Ky takim konsiderohet një nga më të rëndësishmit të sezonit, pasi përballen dy ekipe që tregojnë formë të lartë dhe objektiva ambicioze. Tetova duhet të gjejë mënyrën për të kompensuar mungesën e lojtarit kryesor të mbrojtjes, duke garantuar që skuadra të mbajë konsistencën në të gjithë fazat e lojës.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
