Në Gjirokastër bashkia njoftoi fillimin e punimeve për rehabilitimin e një aksi rural në Lunxhëri dhe një tjetër segmenti, përfshirë edhe urën e Picarit në Cepo.
Investimet me vlera përkatësisht 74 milionë lekë dhe 7,5 milionë pritet të përfundojnë përpara vjeshtës.
Kryetarja e Bashkisë së Gjirokastrës, Zamira Rami tha se të dy investimet do të zgjidhin problematika shumëvjeçare të infrastrukturës rrugore në këto zona.
“Pa diskutim që është një ndërhyrje e rëndësishme sa i takon turizmit. Prej vitesh ka patur një mungesë të theksuar vullneti për të përmirësuar turizmin në këto zona. Premtimi i mbajtur për banorët besoj se do të pasohet me investime të tjera nga Bashkia e Gjirokastrës”, deklaroi Rami.
Lidhja mes fshatrave Dhoksat dhe Qestorat në Lunxhëri ka qenë e lidhur ngushtë me mundësinë e mbërritjes së produkteve të zonës në tregun e qytetit.
Për banorët e Picarit, Kolonjës dhe Golemit, skajit më të largët të Bashkisë së Gjirokastrës investimi pritet të përmirësojë situatën e qarkullimit gjatë dimrit, përiudhë kur aksi behej shpesh i pakalueshëm.
Zonat që vijojnë të mbeten problematike përsa i përket infrastrukturës rurale vijojnë të jenë akset drejt Zhulatit në Cepo, ai drejt tre fshatrave të sipërm në Antigone dhe disa segmente në Odrie./tch
