Një zbulim i rrallë arkeologjik pranë Deti i Galilesë po tërheq vëmendjen e studiuesve, duke ofruar njohuri të reja mbi ritualet e hershme të krishterimit. Arkeologët kanë zbuluar një objekt unik prej mermeri në qytetin antik Hippos, një qendër e rëndësishme peshkopale gjatë periudhës bizantine. Objekti, i cili daton rreth 1,400 vjet më parë, u gjet në një sallë pagëzimi brenda një kompleksi katedral. Sipas studiuesve, ai përbëhet nga një bllok mermeri drejtkëndor me tre zgavra hemisferike dhe mendohet se është përdorur gjatë një faze të panjohur më parë të ceremonisë së pagëzimit.
Hippos dikur ishte i vetmi qytet i krishterë në zonën përreth Detit të Galilesë, një rajon i lidhur ngushtë me jetën dhe veprën e Jezu Krishti. Brenda katedrales janë identifikuar dy hapësira të veçanta pagëzimi: një për të rritur dhe një tjetër për foshnje dhe fëmijë, ku edhe u zbulua objekti i veçantë. Ekspertët besojnë se tre zgavrat mund të kenë shërbyer për ruajtjen e tre llojeve të ndryshme vajrash, të përdorur në një rit të pagëzimit me zhytje të trefishtë. Kjo është e pazakontë, pasi praktikat e njohura deri më tani përfshinin zakonisht vetëm dy vajosje – para dhe pas ceremonisë.
Arkeologu Michael Eisenberg nga Universiteti i Haifës, i cili bashkëpunoi me studiuesen Arleta Kowalewska, theksoi se objekti fillimisht nuk dukej i veçantë. Megjithatë, pas analizave të detajuara, u kuptua rëndësia e tij për të kuptuar praktikat rituale të krishtera në këtë rajon. “Ky është një zbulim unik që mund të mbushë boshllëqe të rëndësishme në njohuritë tona për një nga ritet më të hershme dhe më të shenjta të krishterimit,” u shpreh Eisenberg. Ai shtoi se gjetja mund të ndihmojë në kuptimin e evolucionit të traditave liturgjike, të cilat shpesh ndryshonin nga një rajon në tjetrin dhe nuk janë gjithmonë të dokumentuara. Zbulimi i fundit i shtohet një serie gjetjesh të rëndësishme në Hippos, duke përfshirë një azil pleqsh 1,600-vjeçar dhe thesare me bizhuteri e monedha ari, duke e konfirmuar zonën si një nga sitet më të pasura arkeologjike të periudhës bizantine.
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
