Drejtuesja politike e Qarkut Gjirokastër, Mirela Kumbaro, ka bërë një deklaratë për mediat ku ka folur lidhur me pjesëmarrjen e qytetarëve në zgjedhjet e pjesshme që po mbahen në 5 bashki të vendit, Vlorë, Tepelenë, Mat, Cërrik dhe Berat.
Në një prononcim për mediat Kumbaro tha se deri më tani në Tepelenë ka patur pjesëmarrje të kënaqshme dhe më të mirë krahasuar me të njëjtin orar të zgjedhjeve të majit me 3110 votues deri tani.
Ajo bëri thirrje për pjesëmarrje në votime për pjesën e mbetur të këtij procesi zgjedhor.
“Çdo gjë ka rrjedhur normalisht, nuk kemi pasur probleme. Le të themi se duke pasur parasysh edhe kohën, që për ne shiu është bereqet, por ndoshta e vështirëson pak lëvizjen e njerëzve. Ecuria e pjesëmarrjes ka qenë mjaft e mirë krahasuar me të njëjtin orar në të njëjtën kohë me zgjedhjet e 11 majit 2025 apo zgjedhjet e tjera vendore të 2023.”, tha Kumbaro.
