Nga Ola Xama
Banka e Shqipërisë ka marrë vendimin për pezullimin e licencës së subjektit “Micro Credit Albania” më datën 6 shkurt 2024.
“MCA”-së i është pezulluar licenca dhe në dhjetor të vitit të shkuar për një periudhë 12 muaj, por i është lejuar të administrojë protofolin e kredive që ka patur dhe borxheve të blera më parë.
Kjo masë prodhoi dukurinë e tjetërsimit në masë të pasurive të patundshme të dhjetra qytetarëve përmes zhvillimit të ankandeve fiktive dhe grabitjes së pronave.
Më herët banka qëndrore kishte marrë nismën për të kufizuar rritjen e penaliteteve dhe kamatave jo më shumë se 30% të vlerës së detyrimit, por shkeljet nuk u ndalën.
Këtë herë bashkë me pezullimin e licencës, “Micro Credit Albania” i është ndaluar dhe mbledhja e borxheve korrente dhe i lejohet vetëm shitja e portofolit të kredive të blera më parë të shoqëritë e tjera të borxhit. Po ashtu, detyrohet të reflektojë në regjistrin e kredive detyrimet që janë shlyer.
Kujt i është tjetërsuar prona apo i ka ardhur kërkesë për vjeljen e detyrimit pas datës 6 shkurt, duhet ta ankimojë pasi është një vendim i pavlefshëm. Kujt i vijnë kërkesa për ekzekutim të detyrimeve në emër të “MCA” duhet të shkojë dhe ta denoncojë në organet e drejtësisë. Vendimi është pozitiv, por i vonuar.
Vendimi duhet të ishte njoftuar në datën që është firmosur për të shmangur abuzimet që kanë ndodhur gjatë muajit shkurt. Tani “topi” është në duart e institucioneve të drejtësisë që kanë 4 vjet që mendohen se çdo të bëjnë me këtë dosje!
