Qarku Gjirokastër nuk pritet të ketë asnjë surprizë sa i përket ndarjes së mandateve më 11 maj. Rezultati duket i fiksuar njësoj si viti 2021, aq më tepër kur shikon që PD ka vetëm një ofertë, e cila është refuzuar sistematikisht me votë, Tritan Shehun. Pra, gjasat janë që ndarja e mandateve të jetë sërish 3 me 1 në favor të mazhorancës.
Edhe votat e emigrantëve apo dalja e partive të reja nga projeksionet e deritanishme duket se nuk ndryshojnë asgjë në ndarjen e mandateve. E vetmja garë e vërtetë dhe pse jo disi e ashpër është brenda listës së hapur të Partisë Socialiste.
Renditja që Kumbaro bëri në këtë listën ditën kur e prezantoi në selinë e PS-së nuk ka asnjë rëndësi sepse ishte sipas rendit alfabetik. Më kot u shqetësua dhe Tërmeti që e pa veten i fundit sepse i fillon emri me gërmën T.
Anila Dhimitri, Piro Dhima, Shyqyri Hysi e Tërmet Peçi janë në fushë të hapur. Renditja e tyre në fund do të bëhet jo më sipas rendit alfabetik, por sipas votave që do të marrin. Dy prej tyre që marrin më shumë vota automatikisht fitojnë mandatin e deputetit.
Përtej buzëqeshjeve të kortezisë së turit të parë të prezantimit që po iu bën Mirela Kumbaro, ata do të jenë shumë shpejt në një garë të ethshme me njëri-tjetrin. Ndonëse ka një ndarje formale të zonave ku ata do të përqëndrohen, teorikisht dhe praktikisht askush nuk i ndalon të katërt të kërkojnë vota në të gjithë qarkun. Ky është sistemi i ri në Kodin Zgjedhor.
Nëse Anila Dhimitri ka Përmetin dhe Këlcyrën dy bashkitë ku do të përqëndrojë energjitë e saj, Tërmet Peçi e Shyqyri Hysi do të “përplasen” sidomos në Tepelenë e Memaliaj, por duke mbajtur sytë edhe nga Gjirokastra për shkak të lidhjeve dhe njohjeve të tyre. Piro Dhima ka në fokus bashkitë Gjirokastër, Dropull dhe Libohovën deri diku. Por secili nga ta mund të kërkojë vota kudo në qark.
Çështja këtu është si do të sillet struktura e PS në secilën prej bashkive të qarkut? Nëse pranojmë ndarjen formale të zonave dhe po themi që Anila Dhimitri mbulon Përmetin dhe Këlcyrën, strukturat e PS-së në këto dy bashki nuk mund të jenë në shërbim, fjala vjen të Tërmet Peçit apo Piro Dhimës. Kjo do të çonte në një përplasje të brendshme të PS-së dhe do të harxhonte shumë energji.
Por thënë këto, nuk përjashtohet fare që Tërmet Peçi dhe Piro Dhima të kërkojnë dhe pretendojnë vota edhe në Përmet e Këlcyrë me njohjet dhe lidhjet e tyre. Tjetër, nëse Shyqyri Hysi formalisht do të përqëndrohet në Memaliaj, struktura e PS-së në këtë bashki duhet të jetë në shërbim të tij.
Apo shembull tjetër, struktura e PS-së në Gjirokastër e Dropull duhet të jenë në funksion të Piro Dhimës nëse këto dy bashki janë formalisht zona elektorale për këtë kandidat. Pa një ndarje formale të zonave do të kemi një përplasje brenda radhëve të PS-së sepse në këto zgjedhje çdo votë vlen më shumë se asnjëherë më parë.
Në letër i avantazhuar nga kandidatët e listës së hapur ngjan të jetë Tërmet Peçi sepse është i testuar elektoralisht prej 14 vitesh dhe ka nga mbrapa edhe strukturën e Bashkisë Tepelenë nga e cila u dorëhoq para disa ditësh. Megjithatë ky është një sistem i hapur dhe fitues në raport me tjetrin del ai që merr qoftë edhe një votë më tepër.
Gara e 11 majit në qarkun Gjirokastër është mes kandidatëve të listës së hapur të PS-së. Veç Tritan Shehut që duan ta bëjnë sërish deputet, fitore për PD-në në këto zgjedhje është të gjejë të paktën komisionerë në çdo qendër votimi. ©Argjiroja.net
