Drejtuesja politike e Partisë Socialiste për Qarkun e Gjirokastrës, Mirela Kumbaro, ka ndarë një mesazh në rrjetet sociale ku thekson angazhimin e strukturave socialiste për intensifikimin e punës në muajt e pranverës në të gjithë qarkun.
Në postimin e saj, Kumbaro shprehet se socialistët e qarkut, së bashku me deputetët dhe përfaqësuesit e qeverisjes vendore, po përgatiten për një sezon pune të përqendruar te përmirësimi i shërbimeve për qytetarët dhe avancimi i projekteve zhvillimore.
Sipas saj, fokusi do të jetë te rritja e cilësisë së shërbimeve publike, dhënia e përgjigjeve më të shpejta për komunitetin, si dhe ndjekja nga afër e kantiereve të nisura tashmë në territor.
Njëkohësisht, drejtuesja politike e PS për qarkun thekson se po punohet edhe për përgatitjen e projekteve të reja zhvillimore që do të shtrihen në të gjitha bashkitë e Qarkut të Gjirokastrës.
“Bashkë, deputetë e qeverisje vendore, jemi socialistë që bëhemi gati për punët e pranverës në qarkun tonë; për shërbime më të mira, për përgjigje më të shpejta, për të ndjekur kantiere të nisura e për të përgatitur projekte të reja në të katër cepat e Qarkut Gjirokastër”, shkruan Kumbaro në postimin e saj.
