130 punonjës të burgjeve me rekorde kriminale. Ka edhe në burgun e Bënçës në Tepelenë

Ministrja e Drejtësisë, Etilda Gjonaj tha se janë 130 punonjës të policisë së burgjeve që janë të përfshirë në rekorde penale. Shefja e dikasterit të drejtësisë gjatë raportimit në Komisionin e Integrimit Europian tha se ka filluar edhe procedimi disiplinor për ta.
“Nga një vlerësim që është bërë me drejtorinë e Burgjeve ka rezultuar që rreth 130 punonjës të policisë së burgjeve kanë qenë me rekorde penale, për të cilët njëkohësisht ka filluar një procedim disiplinor për të parë nëse ata mund të qëndrojnë apo duhet të largohen. Në rast se nuk merren këto masa për këtë staf të rëndësishëm do të jetë e pamundur funksionimi normal dhe përgjegjshmërisë brenda këtyre institucioneve”, tha ministrja e Drejtesise.
Gjithashtu Gjonaj bëri të ditur se brenda këtij muaji do të hapet burgu i Reçit në Shkodër, me një kapacitet prej 750 personash të dënuar. Ky burg është investuar nga fondet e BE-së dhe mendohet se do të jetë streha e të dënuarve nga reforma në drejtësi, apo e ‘peshqve të mëdhenj’.