Lajme të mira vijnë nga qyteti i Fierit, ku i gjithë stafi mjekësor që dyshohej se ishte infektuar me koronavirus ka rezultuar negativ. Ditën e sotme kanë dalë analizat e 17 mjekëve, infermierëve dhe stafit ndihmës të spitalit Rajonal, dhe asnjë prej tyre nuk ka pasur shenja të virusit covid-19 në trupin e tyre.
17 pjesëtarë të stafit u vetëkarantinuan pas rastit të një 61-vjeçareje të infektuar me COVID-19, e cila nuk deklaroi qe kishte ardhur nga Italia dhe kishte marrë ndihmë në këtë spital. Por duke qënë se të gjithë kanë dalë negativë, të gjitha “bluzat e bardha” kanë rezultuar negative.
Gruaja e prekur nga COVID-19 në Fier u kthye në datën 6 mars nga Italia. Pas kthimit në shtëpi ajo ka pasur probleme me frymëmarrjen dhe është shtruar në spital por nuk ka treguar në asnjë moment që ka qënë në Itali edhe pse është pyetur nga mjekët.
Gjatë gjithë kohës kur ajo ka ndenjur në spital, ajo ka patur kontakte të lirshme me stafin po edhe me pacientë të tjerë, dhe të afërm të saj. Aktualisht ajo ndodhet në Tiranë, ndërsa stafi mjekësor që i shërbeu asaj u karantiua për disa ditë.
Bilanci i COVID-19 në Shqipëri ka shkuar në 55 të prekur, mes tyre një viktimë. 9 prej të infektuarëve janë mjekë dhe infermierë, një nga Spitali i Durrësit dhe të tjerët nga spitali “Shefqet Ndroqi”. Vatra e të infektuarve është zgjeruar në Tiranë, Rrogozhinë, Elbasan, Durrës, Lushnje dhe Fier. Jeta në vend është paralizuar thuajse totalisht, nuk ka transport publik, është ndaluar lëvizja me makinë apo me këmbë, si dhe shumë vende punë janë mbyllur. Në shërbim të shtetit do të jenë edhe spitalet private gjatë periudhës së emergjencës dhe kush nuk bindet do ketë gjobë deri në 5 milionë Lekë. E vetmja këshillë e përbashkët e institucioneve dhe mjekëve është që qytetarët të qendrojnë në shtëpi dhe të kenë sa më pak kontakte me të tjerët.
