Policia ka zbardhur atentatin me tritol të ndodhur më 10 tetor në Gjirokastër, ku humbi jetën Beqir Devolli, i njohur edhe si Çilo Hunderri, dhe mbeti i plagosur pasagjeri Erigels Mela.
Në kuadër të operacionit policor të koduar “Gjurma”, janë arrestuar dy persona, ndërsa dy të tjerë janë shpallur në kërkim.
Në pranga kanë rënë Behar Zyberi, alias Behar Heqimaj, 64 vjeç, banues në Fier, dhe Shpëtim Malasi, 42 vjeç, banues në Patos.
Ndërkohë, në kërkim janë shpallur Gentjan Zhupa, 38 vjeç, banues në Tepelenë, dhe Kliton Omeri, alias Kliton Nanushi, 44 vjeç, banues në Tiranë. Sipas Policisë, dy të fundit janë larguar jashtë vendit pas ngjarjes.
Ngjarja e rëndë ndodhi më 10 tetor 2026, rreth orës 22:00, në bulevardin “18 Shtatori”, përballë Prokurorisë së Gjirokastrës.
Një automjet tip “Benz”, në të cilin udhëtonin Beqir Devolli dhe Erigels Mela, shpërtheu në lëvizje pasi në pjesën poshtë sediljes së shoferit ishte vendosur një sasi lënde plasëse. Pas shpërthimit, drejtuesi humbi kontrollin e automjetit dhe u përplas me trafikndarësen e rrugës.
Si pasojë, 48-vjeçari Beqir Devolli humbi jetën, ndërsa 26-vjeçari Erigels Mela mbeti i plagosur lehtë.
