Familjarët e viktimave të “21 janarit” janë paraqitur në dyert e Prokurorisë së Posaçme Kundër Korrupsionit dhe Krimit të Organizuar (SPAK) për të dorëzuar një tjetër kallëzim. Ata shoqërohen nga kreu i grupit parlamentar Taulant Balla. Familjarët e viktimave të 21 janarit do të depozitojnë kallëzim për kryedemokratin Sali Berisha dhe ish-kreun e PD-së Lulzim Basha. Ky kallëzim vjen në një ditë që Opozita ka organizuar një tjetër protestë kombëtare para Kuvendit.
Çfarë ndodhi më 21 janar 2011?
Më 21 janar 2011, në një protestë të organizuar nga Partia Socialiste, asokohe në opozitë, u vranë nga Garda e Republikës 4 protestuesit Ziver Veizi, Faik Myrtaj dhe Hekuran Deda dhe Aleks Nika. Kryeministri i kohës, Sali Berisha deklaroi se opozita kishte përgatitur një “grusht shteti” për të rrëzuar qeverinë, ndërsa opozita akuzoi qeverinë se vrau 4 qytetarë të pafajshëm. Në hetimin që u bë për vrasjen e protestuesve, të pandehur u morën Ndrea Prendi dhe Agim Llupo, ndërsa gjykata vlerësoi me vendim se vrasjet kanë ndodhur nga pakujdesia. Të dy të pandehurit u dënuan, ish-komandanti i Gardës, Ndrea Prendi me 1 vit ndërsa gardisti Agim Llupo me 3 vite burg