Pas 24 vitesh deputet, Vangjel Tavo e konsideron veten ende shpresë për rininë e vendit. Përmes një mesazhi në faqen e tij në Facebook, me rastin e Ditës Ndërkombëtare të Rinisë, ish-deputeti i LSI-së thotë se kjo qeveri i prishi ëndrrat të rinjve, ndërkohë LSI-në ku ai bën pjesë, e konsideron “front shprese”.
Mesazhi i plotë i Tavos
Sot në Ditën Ndërkombëtare të Rinisë kujtojmë ëndrrën 30 vjeçare të rinisë së asaj kohe për një Shqipëri si e gjithë Evropa. Ajo rini tashmë e plakur ende nuk e arriti ëndrrën për ta parë Shqipërinë anëtare në familjen evropiane ndërsa rinia e sotme është e pashpresë, e papunë, dhe e detyruar të largohet nga vendi. Rinia jonë meriton mundësi dhe të ardhme më të mirë. Meriton kushte e mundësi si bashkëmoshatarët e tyre në Evropë. Kjo qeveri ia prishi ëndrrat por fronti i shpresës do i largojë këta pengmarrës të integrimit. Rinia shqiptare është evropiane me mendje, ëndrra dhe zemër, vendi i saj është në Evropën e Bashkuar dhe jo viktimë e një mendësie anti-rinore dhe një qeverie anti-progresi, anti-demokracie. 30 vite më parë ishte rinia ajo që e rrëzoi diktaturën më të ashpër të Evropës, do jetë po rinia ajo që do rrëzojë diktaturën e sotme!