Katër shqiptarë nga Saranda rezultojnë të prekur me koronavirus në Greqi. Mësohet se ata janë minoritarë me shtetësi të dyfishtë që jetojnë në ishullin Zakynthos.
Bëhet fjalë për vëlla e motër dhe bashkëshortët e tyre, të moshës 55-60 vjeçarë. Një çift janë pronarë të një restoranti në zonë turistike që funksionon vetëm gjatë sezonit veror, ndërsa çifti tjetër pronarë të një mini marketi, gjithashtu kryesisht sezonale.
Duke shfrytëzuar periudhën jashtë sezonit, 2 çiftet udhëtuan me grupin e pelegrinëve në Izrael dhe Egjipt, nga ku 54 persona kanë rezultuar pozitivë. Sipas informacioneve, janë në gjendje të mirë shëndetësore, megjithë simptomat nuk duket të jenë në rrezik për jetën.
Ndërsa numri i personave të infektuar me virusin vdekjeprurës në Greqi ka shkuar në 99. Sot u regjistrua edhe viktima e parë e COVI-19 në shtetin fqinj. Mediat greke raportojnë se një 66-vjeçar ka ndërruar jetë pas komplikacioneve. Viktima raportohet se vuante edhe nga sëmundjet e zemrës.
