Kryeministri Edi Rama ka bërë me dije se ka zhvilluar një komunikim telefonik rreth 45-minutësh me kancelaren e Gjermanisë, Angela Merkel.
Në një postim në llogarinë e tij zyrtare në “Twitter”, Rama shkruan se në këtë bisedë, janë vënë pikat mbi “i” për ecurinë e mëtejshme të përpjekjeve të përbashkëta për çeljen e negociatave.
POSTIMI I RAMËS:
Gjatë një telefonate rreth 45 min me Kancelaren Merkel vendosëm të gjitha pikat mbi “i” për ecurinë e mëtejshme të përpjekjeve të përbashkëta për çeljen e negociatave për anëtarësim🇦🇱🇪🇺Kancelarja rinënvizoi qëndrimin e Gjermanisë në mbështetje të Shqipërisë🇩🇪🤝🇦🇱Danke Angela🙏
Në fund të shtatorit, në paraprirje të mbledhjes së Këshilit Evropian (17-18 tetor), Bundestagu gjerman vendosi 9 kushte kundrejt dhënies së pëlqimit për çeljen e negociatave të Shqipërisë në BE. Këto kushte ndaheshin në imediate dhe afatgjata, duke variuar nga realizimi në mënyrë gjithëpërfshirëse i Reformës Zgjedhore e deri tek ndjekja penale e personave të përfshirë në manipulimin e zgjedhjeve.
Në ndryshim nga rasti i Shqipërisë, Gjermania kërkoi hapjen pa kushte të bisedimeve me vendin tjetër kandidat, Maqedoninë e Veriut. Por, vetoja e Francës i la edhe këtë herë në vendnumëro të dyja vendet.
