Shirat intensivë të kësaj vjeshte, në disa raste kanë shkaktuar bllokimin e turistëve, kryesisht të huaj, të cilët vizitojnë kanionin e lumit Langaricë, në zonën e Përmetit.
Vetëm në dy raste të tilla policia lokale në bashkëpunim me strukturat e emergjencave ka ndërhyrë për evakuimin e 46 turistëve të huaj që janë rrezikuar nga rritja e nivelit të lumit në kanionet e Langaricës.
“Kemi pasur 6 raste ku është dhënë ndihma së bashku me emergjencat civile nga ana e Komisariatit të Policisë Përmet në bashkëpunim edhe me zjarrfikësit, ku dy rastet e fundit janë në kanionet e Langaricës dhe në banjat e Bënjës, problematikë ngelet kanioni i Langaricës sidomos tani që është edhe stina e vjeshtës pasi prurjet e shumta nga reshjet rritin nivelin e ujit dhe bëhet shumë i rrezikshëm për këta turistë.”, – u shpreh drejtuesi i Komisariatit të Policisë Përmet, Bledar Metaj.
Apeli i uniformave blu të Përmetit i bashkohet sensibilizimit të vazhdueshëm të udhërrëfyesve turistikë lokale që turistët, të cilët vizitojnë kanionet e Langaricës të tregojnë kujdes gjatë lëvizjes, veçanërisht në ditët me mot të keq.
“Një apel që do të bëja unë është në rastet që këta turistë frekuentojnë kanionin e Langaricës duhet të na njoftojnë sepse ne në bashkëpunim edhe me Ministrinë e Turizmit edhe me entin pronar, Bashkinë Përmet, kemi plotësuar me sinjalistikën përkatëse në të dyja gjuhët shqip dhe anglisht për turistët por ata nuk i marrin parasysh dhe futen pa marrë parasysh rrezikshmëritë që ka ky kanion, i bëj thirrje edhe guidave turistike që të ketë bashkëpunim me Komisariatin e Policisë Përmet për të neutralizuar këto problematika,” – tha Metaj.
Tashmë zona e Përmetit është kthyer në një qendër të rëndësishme përsa i përket zhvillimit të turizmit ndërsa përgjatë këtij viti është vizituar nga rreth 100 mijë turistë.
