Ministri teknik i Drejtësisë, Gazmend Bardhi dhe Drejtori i Përgjithshëm i Burgjeve, edhe ai pjesë e paketës së teknikëve të PD, kanë shkarkuar nga detyra 5 drejtorë të burgjeve, pa urdhër me shkrim, por thjesht me një njoftim për mediat.
Burime të Lapsi.al bënë të ditur se të shtunën, drejtorët e shkarkuar kanë qenë në mbledhje rreth orës 13:00 me drejtorin Arjan Hoxha dhe ai nuk u ka komunikuar ndonjë masë apo vendim për t’i larguar nga detyra.
Por sapo kanë dalë nga mbledhja ata kanë marrë vesh nëpërmjet medias se ishin shkarkuar.
Ditën e hënë (sot), duke qenë se nuk kishin asnjë vendim zyrtar me shkrim për shkarkimin nga detyra, drejtorët janë paraqitur në punë, qoftë edhe për t’u njohur me situatën e re me të cilën ishin njoftuar nga mediat, por nuk janë lejuar nga oficeri i rojës.
Burime të Lapsi.al sqaruan se oficeri i rojës u ka komunikuar një urdhër verbal për të mos i lënë të hyjnë brenda.
Në këtë mënyrë, drejtorët nuk kanë pasur mundësi as të bëjnë dorëzimet apo të marrin sendet personale që kanë në zyrë.
“Nuk na lanë të marrim as fotot e fëmijëve që mbajmë në tavolinë”, është shprehur njëri prej tyre pasi është ndaluar nga oficeri i rojës.
Sot në vendet e 5 drejtorëve të shkarkuar janë komanduar disa shefa të Policisë së Burgjeve, pasi Ministri teknik dhe Drejtori i Përgjithshëm i Burgjeve (edhe ai teknik) nuk kanë atribute për të bërë emërime.
Deri tani janë 5 burgje pa drejtorë, çka rrezikon mbarëvajtjen e tyre, për më tepër në fushatë elektorale.
Por ajo që e bën më skandaloze këtë situatë, është mënyra e shkarkimit të drejtorëve nga ministri dhe drejtori i përgjithshëm teknik, pasi për vendimet nuk është ndjekur asnjë procedurë që parashikon ligji për administratën, por ata janë flakur në rrugë thjesht me një urdhër verbal dhe pa marrë asnjë motivacion për largimet.
Administrata e burgjeve nuk është e vetmja që përballet me reprezalje të tilla nga ministrat teknikë. Pas paktit Rama – Basha të tjerë drejtues në sektorë të ndryshëm si arsim e shëndetësi janë pushuar nga puna, por në këto raste vendimet janë shoqëruar me motivacionin se kanë marrë pjesë në fushatë elektorale. /Lapsi
