Cristian Chivu është shumë pranë një suksesi të veçantë që në shtëpinë e Inter nuk ndodhte prej 88 vitesh. Pasi fitoi 3 herë titullin në Serie A si lojtar me fanellën zikaltër, Chivu është shumë pranë edhe titullit si trajner. Për herë të fundit që kjo ndodhte, pra që një ish lojtar arriti të fitojë edhe titullin si trajner daton në sezonin e largët 1937-38.
Në sezonin e tij të parë si trajner në Serie A, Chivu është shumë pranë një arritje të madhe edhe në aspektin personal. Sigurisht, ekipi i tij nuk ka qenë brilant, por askush nuk ka bërë më mirë se sa zikaltërit. 6 javë përpara fundit, Inter qëndron i qetë në krye, plus 9 pikë në raport me vendin e dytë. Titulli në këto kushte është thjesht një formalitet, por mediat janë kapur pas një detaji shumë të fortë. Inter ndodhet +9 në raport me Napolin dhe +12 në raport me Milan, por kjo diferencë nuk ka ardhur si pasojë e sfidave direkte ndaj rivalëve për titull:
“Inter, 75 pikë pa mundur Conten dhe Allegrin. Titullin e 21-të e kanë fituar kështu”, shkruan Corriere dello Sport në faqen e parë. Në katër përballjet me dy ndjekësit më të afërt, Inter numëron vetëm 1 barazim dhe 3 humbje. Mbi teknikun zikaltër rendon shumë fakti që në dy derbet përballë Milan ka dalë “duar bosh”, dy humbje, por në fund këto janë thjesht detaje pasi titulli në Serie A ka marrë një rrugë pa kthim drejt pjesës zikaltër të Milanos.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
