Ish-deputeti i LSI-së në Gjirokastër, Vangjel Tavo, ka bërë një reagim të ashpër sot kundër kryebashkiakut të Gjirokastrës, Flamur Golemi, dy ditë pasi u prezantua projekti për Bypassin e qytetit, që i jep zgjidhje devijimit të trafikut të automjeteve në zonën muzeale. Problemi i tij nuk është transparenca e projektit, për të cilin kishte një prezantim publik dhe ftesë për të marrë pjesë.
Fare mirë mund të shkonte kushdo, edhe vetë Vangjeli madje. Ndërkohë që me siguri do të ketë konsultime të tjera në vijim. Vangjel Tavon s’e lidh asgjë me transparencën këtu e 24 vite që ka patur mandat deputeti. Mjafton të shohësh këtu gjithë piruetat e tij politike sa nga PS-ja e te LSI-ja në funksion të pushtetit të vet personal; mjafton të shohësh si e qeveriste ai Bashkinë Gjirokastër me Zamira Ramin, si i mblidhte ai lekët për LSI-në përmes Zyrës së Burimeve Njerëzore në Bashkinë Gjirokastër, si e ndante një vend pune për disa persona vetëm e vetëm për t’u marrë votën; si i bënin largimet nga puna me letër me vrimë dhe si e përdori klubin e futbollit Luftëtari për të zhvatur miliona nga buxheti i bashkisë.
Mjafton të shohësh si e qeveriste Bashkinë Dropull me “kukullën” e tij Ahilea Deçka, që miratonte leje guroresh për të vëllain e tij e plot përfitime të tjera. Natyrisht pa asnjë transparencë dhe në funksion të zgjerimit të pushtetit të tij. Vangjel Tavos nuk i bëhet vonë për transparencën e projektit, as nuk ka merakun e konsultimeve publike. Problemi i tij është me vështirësinë për të dalë deputet në 25 prill. LSI rrezikon mandatin e Tavos në Gjirokastër, jo më të marrë mandat të dytë për Brisin që s’ka asnjë shans.
Prandaj Tavo shfaqet si ‘dashnor’ i transparencës dhe sulmon çdo punë e projekt që bën Bashkia Gjirokastër. Kush e njeh Vangjel Tavon dhe enturazhin e tij, e di fare mirë që ai s’ka lidhje me transparencën, por veç me pazaret. Vangjel Tavo është i fundit që duhet të vëjë kujën për transparencë. “Dashnor” të listave të hapura edhe pranonim, meqë ishte në modë kohët e fundit të flitej për to, por “dashnor” i transparencës është vërtet shumë. Mos e tepëro Vangjel!
©argjiroja.net
