Pak kohë pas shkarkimit të nënkryetarit të Bashkisë Gjirokastër, Ylli Muho, kryebashkiakja Zamira Rami shkarkon një tjetër përfaqësues të Partisë Socialiste.
Është fjala për Fadil Bojon, drejtor i Punëve Publike. Shkresa me firmën e Ramit i është komunikuar nga nënkryetari i Bashkisë, por pa i dhënë motivacionin.
Pas këtij vendimi me siguri fshihet pozicioni i Fadil Bojos si koordinator i PS-së për lagjen “18 Shtatori” në Gjirokastër.
Burime të ArgjiroLajm.net bëjnë me dije se përfaqësues të PS-së të mbetur ende në administratën e Bashkisë Gjirokastër janë nën presion prej kryebashkiakes, e cila i vendos përballë zgjedhjes: Ose kaloni haptaz pro LSI-së ose vendi i punës rrezikohet.
Burimet thonë se pritet të ketë shkarkime të tjera në ditët e ardhshme. Situata brenda LSI-së jo vetëm në Gjirokastër, por në rang kombëtar nuk është e qetë pas marrëveshjes Rama-Basha, e cila parashikon që çdo parti të hyjë e vetme në zgjedhje, jashtë koalicioneve.
Kjo do ta penalizonte shumë LSI-në dhe partitë e tjera të vogla pasi të qenit jashtë koalicioneve i jep një numër më të vogël deputetësh. Mbetet për t’u parë se si do të zhvillohen ngjarjet në vijim.
/ArgjiroLajm.net/
