Sot u raportua në media lajmi se në spitalin e Gjirokastrës është hapur shërbimi ditor i urgjencës për rastet e prekura me Covid. Por në fakt e vërteta është se nuk bëhet fjalë për asgjë ekstra asaj që është bërë për gjithë këto muaj. Në spitalin “Omer Nishani” kryehet thjesht triazhimi për pacientët e dyshuar me koronavirus në disa ambiente të vecanta. Ky shërbim ka funksionuar edhe muaj më parë qysh kur nisi pandemia e Covid 19. Ndërkohë për pacientët e konfirmuar me koronavirus dhe që kanë nevojë për trajtim spitalor, ata dërgohen drejt spitaleve Covid në Tiranë.
Deri më tani në spitalin e Gjirokastrës nuk trajtohen pacientët me koronavirus. Të infektuarit që kanë nevojë për trajtim spitalor dërgohen drejt kryeqytetit, ndërsa pjesa tjetër më e madhe në numër e pacientëve marrin trajtim në shtëpi. Në rast se pandemia do të përparojë dhe do të kemi shtim të rasteve të reja, i pari në jug që do të shndërrohet në spital Covid është spitali i Fierit. Por për momentin jemi ende shumë larg këtij skenari. Aktualisht janë 3 spitale Covid në Tiranë dhe një i katërt ndodhet gati në pritje të pacientëve të rinj.
Sot një 35 vjeçare nga Lazarati u nis për trajtim të specializuar në Turqi si pasojë e komplikimeve shëndetësore pas prekjes nga Covid-19. Mes të prekurve, disa prej të cilëve në kushte të rënduara, ka mjekë, personel shëndetësor, efektivë policie, punonjës administrate, ndërsa dy kopshte, një shkollë dhe 3 fasoneri janë mbyllur vetëm në qytetin e Gjirokastrës.
©argjiroja.net
