Kryeministri Edi Rama ka reaguar pas denoncimit të kreut të Partisë Demokratike, Lulzim Basha se numri i viktimave që kanë humbur jetën nga COVID-19 është manipuluar nga autoritetet. Rama thotë se ne nuk mund të jemi rasti unikal ku qeveria lufton kundër COVID dhe opozita bashkë me Presidentin të bëjnë aleancë me COVID-in për të rrëzuar qeverinë”.
Fotogratitë nga morgu i Tiranës, të cilat pushtuan mediat sociale ditën e djeshme, Rama i ka quajtur thjeshtë klandestine, duke theksuar se shpërndarja e tyre nuk është as demokratike dhe as shqiptare, por haptazi jonjerëzore.
“Jam krenar se si ne kemi reaguar si popull në të dyja rastet. Qoftë në 26 nëntor, apo duke bërë edhe pjesën e sakrificës në përballje me virusin që po sprovon mbarë botën. Jam krenar si kryeministër se si forcat e shtetit dhe ato shëndetësore janë vënë në dispozicion të qytetarëve.
Jam i keqardhur që kjo dalje sot u provokua nga krejt e kundërta e karakterit të fortë që i ka karakterizuar shqiptarët në këtë përballje.
Një pakicë e zhurmshme qëndron mënjanë, shan, akuzon dhe lufton përditë në frontin e kësaj lufte nervash.
Nuk jam këtu për baltën dhe pështymën që marr përditë nga pakica e zhurmshme. Mua të sharat që më adresohen më bëjnë më të fortë dhe realisht me japin më shumë energji për t’i udhëhequr betejat tona në çdo fushë.
Në mes te një luftë mund të sfidohet edhe qeveria, por edhe ekspertiza, por nuk mundet që deri edhe presidenti të krijojë komitetin alternativ edhe opozita gjithashtu, ku një komitet thotë që të mbahen maskat dhe një tjetër të thotë që qytetarët të shkojnë në kisha dhe xhamia të luten për largimin e qeverisë.
Ne nuk mund të jemi rasti unikal ku qeveria lufton kundër COVID dhe opozita bashkë me presidentin të bëjnë aleancë me COVID-in për të rrëzuar qeverinë dhe duke shpërndarë fotografi klandestine nga morgu i spitalit. Nuk është as demokratike dhe as shqiptare, por haptazi jonjerëzore”, tha Rama.
Në mesazhin e tij, Rama përgënjeshtroi akuzën e Bashës se po fshihen viktimat, duke i cilësuar sulmet si një akt të turpshëm, që ”tejkalon demokracinë”, një “lëndim i patolerueshëm i karakterit tonë si vend, episod i shëmtuar i luftës për pushtet, që nuk duhet harruar nga asnjë shqiptar”.
Kryeministri akuzoi opozitën dhe presidentin duke thënë se sipas tij, akuzat e pabaza, me fotografi “klandestine” nga morgu, tregojnë “ka një dobësi të frikshme të karakterit të opozitës.
Viktimat nuk janë kuti këpucësh që mund t’i fshehim, ata nuk treten në ajër. Mjekët në front të parë nuk janë si këshilltarët e presidentit që shpërndajnë lajme të rreme, nuk fshihen viktimat si u fshinë videot e kryeministrisë në 21 janar. Opozita dhe presidenti po bëhen palë me COVID-19 për të rrëzuar qeverinë”.
Rama cilësoi akuzat edhe si të rrezikshme për vetë mjekët sepse “nxit urrejtjen ndaj tyre”.
Kreu i qeverisë mohoi që të jenë fshehur numrat e viktimave nga COVID, duke thënë se qeveria nuk ka as mundësi praktike dhe as teorike ta bëjë një gjë të tillë.
“Të dalësh e të thuash që qeveria po fsheh numrin e të vdekurve është çnjerëzore. Sa do i dobët qoftë karakteri i lidershipit të një partie, si mund të cenohet integriteti njerëzor, jo profesional i një armate të madhe mjekësh që kanë harruar familjet e tyre.
Si mund t ë bjerë kaq poshtë qenia politike dhe të provokojë deri në palcë çdo familje që kanë humbur të dashurit e vetë dhe të fusë tmerrin për ata që kanë të sëmurë të afërmit. Ky nuk është karakteri i këtij i vendi, nuk është karakteri i këtij populli, e as i politikës në vetvete.
S’ka më turp se kaq. Por dhe këtë nuk e thua dot më, në fakt në këtë pikë nuk është e imagjinueshme se ku mund të shkojë paturpësia e këtij vendi. Pse ça janë këta që vdesin vota që humbasin gjatë votimit të zgjedhjeve në PD, apo kuti këpucësh që mbushen me lekë në Lalëz e shpërndahen në burime mediatike.
Nuk ka asnjë mundësi teorike dhe as praktike që qeveria të fsheh numrin real të viktimave. Ashtu siç nuk ka asnjë parti politike që të përcaktojë diagnozën e vdekjeve të pacientëve në spital. Nuk është hera e parë, por është kulmimi i një serie rastesh sulmesh, që ngre akuza për thirrjen e Prokurorisë. Mjekët sot kanë nevojë për solidaritet dhe kjo e kalon neverinë e politikës”, tha ai.