Ministri i Mbrojtjes në Turqi: Vendimi i SHBA-së për vendosje sanksionesh ndaj Turqisë ka tronditur aleancën

Vendimi i SHBA-së për të vendosur sanksione ndaj Turqisë ka tronditur thellësisht vlerat e aleancës midis dy vendeve, tha ministri i Mbrojtjes i vendit, Hulusi Akar, duke e dënuar këtë masë.
“Ne e dënojmë këtë vendim, i cili nuk përputhet me aleancën, realitetet aktuale ushtarake dhe politike”, tha Akar për Anadolu Agency (AA).
SHBA-ja të hënën vendosi sanksione ndaj Turqisë për blerjen e saj të sistemit të mbrojtjes raketore ruse S-400.
“Ky vendim sanksionimi ka tronditur të gjitha vlerat e aleancës midis vendeve tona”, theksoi Akar.
Duke nënvizuar kërcënimet ajrore dhe raketore me të cilat përballet Turqia, ai tha se vendi po merr të gjitha masat për të mbrojtur veten dhe popullin e tij.
“Padyshim, sanksionet ndaj një vendi anëtar të NATO-s jo vetëm që do të minojnë frymën e aleancës, por edhe besimin midis aleatëve”, tha Akar.
Turqia ka qenë një anëtare e aleancës së NATO-s për gati 70 vjet.
Në prill të vitit 2017, kur përpjekjet e saj të zgjatura për të blerë sistemin e mbrojtjes ajrore Patriot nga SHBA-ja rezultuan të pafrytshme, Turqia nënshkroi një kontratë me Rusinë për të blerë sistemin S-400.
Duke kundërshtuar vendosjen e sistemit rus, zyrtarët amerikanë pretenduan se ata nuk do të jenë në pajtueshmëri me sistemet e NATO-s dhe do të ekspozonin avionët e gjeneratës së ardhshme F-35 ndaj manipulimit të mundshëm rus.
Turqia, megjithatë, ka theksuar se S-400 nuk do të integrohej në sistemet e NATO-s dhe nuk përbën asnjë kërcënim për aleancën ose armatimet e saj.
Turqia gjithashtu ka propozuar një komision për të sqaruar çdo çështje teknike, por SHBA-ja nuk ka arritur të përgjigjet./AA