Kandidati i PS në Gjirokastër Bledi Çuçi zhvilloi një takim me grupe artistësh dhe shkrimtarësh, ku iu prezantoi me disa nga risitë e programit për kulturën dhe trashëgiminë në qytet. Çuçi u shpreh se investimet prej 40 milionë euro të bëra në Gjirokastër kanë nxjerrë në dukje trashëgiminë e pasur kulturore dhe historike të saj.
“Në 44 muaj, vetëm Gjirokastra ka përfituar 40 milionë euro investime, duke nisur nga Viroi, shëtitorja, rruga, shtëpia e Kadaresë, pjesa e qafës së Pazarit, pjesa e rehabilitim të fasadave të Gjirokastrës “së shëmtuar”, pjesa e lyerjes me ngjyrë që të zbehë pak dominancen dhe të dalë në pah pjesa e vjetër e Gjirokastrës, vlera e vërete e Gjirokastrës.” Më tej, ai deklaroi se këto projekte do të kenë ndikim të drejtpërdrejtë në numrin e turistëve dhe do t’a shndërrojnë Gjirokastrën në destinacionin kryesor turistik në Shqipëri.
“Jam gati të vë bast me këdo, që Gjirokastra brenda 2-3 viteve do e lërë mbrapa Korçën sa i përket ofertës, numrit të turizmit dhe mobilitetit që do ketë brenda jo vetëm këta turistë të huaj, por brenda për numrin e turistëve që do vijnë për të kaluar një ëeekend.”
Një nga projektet më interesante për qytetin e Gjirokastrës do të jetë ai i restaurimit të shtëpive karakteristike të qytetit, duke i emërtuar sipas shkrimtarëve më të mëdhenj të letërsisë botërore. Këto shtëpi do të vihen në dispozicion të shkrimtarëve dhe artistëve të rinj me synim stimulimin e krijimtarisë dhe promovimin turistik.
“Kemi një projekt shumë interesant, do marrim shtëpi të vjetra gjirokastrite, karakteristike, do investojmë dhe do japim paratë nga qeveria, sepse Bashkia nuk mund ta ketë fuqinë për ta bërë këtë dhe do i vemë emra shkrimtarësh, psh shtëpia Marquez. Meqe kemi Kadarenë, nuk do e lëmë vetëm, por do e rrethojmë me gjigandët botërore të letrave, dhe do i kthejmë në koloni artistësh. Psh një shkrimtari do t’I jepet një shtëpi pa qera për të bërë krijimtari dhe e gjithë kjo kthehet në një pol shumë interesant për të thithur vëmendjen e turistëve. Projekti është gati dhe mandatin tjetër zgjedhim shtëpitë.“
